Berjumst gegn ofbeldismenningu og hvetjum ofbeldismenn til að axla ábyrgð.

Ljúfasti maður sem ég þekki! Hann er alltaf til staðar fyrir vini sína, það er enginn betri á trúnó en Maggi. Þessar sögur um hann eru algjör uppspuni. Ég veit ekki af hverju hún er að ljúga svona upp á hann, en það er alveg týpískt, auðvitað.

Ég hlusta á hlaðvarpið hans Magga daglega, hann kemur mér alltaf í gott skap. Hann er svo fyndinn og klár, algjör sjarmur. Mér fannst svo flott hjá honum þegar hann svaraði öllum þessum ásökunum í þættinum hjá sér. Ég trúi honum. Hann myndi aldrei gera svona.

Ég fór á stefnumót með Magga í fyrrasumar og það eru stærstu mistök lífs míns. Kvöldið byrjaði vel og hann heillaði mig alveg upp úr skónum. Þegar leið á kvöldið byrjaði hann að káfa meira og meira á mér, sama hvað ég sagði, og þegar ég reyndi að fara þá hélt hann mér niðri og nauðgaði mér.

Það eru fáir sem lifa sig jafn mikið inn í leikinn og Óli. Þvílíkt passion! Ég fylgdist lítið með málinu þegar hann var látinn hætta sem þjálfari hjá kvennaliðinu, fannst það ekki koma mér neitt við. Hann er allavega geggjaður þjálfari og mjög góður í að peppa okkur strákana.

Ég get varla ímyndað mér betri tengdason en hann Óla. Hann er frábær pabbi og stelpurnar eru svo heppnar með hann. Ég dáðist að þrautseigjunni í honum að gefast ekki upp þegar hann var látinn fara sem þjálfari hjá kvennaliðinu. Það er alveg fáránlegt að menn geti bara misst vinnuna sí svona. Hann var bara að vera vinalegur við stelpuna, eins og hann er við alla.

Óli var þjálfarinn minn í nokkur ár. Ég hafði heyrt sögur af óþægilegri hegðun hjá honum og fór fljótlega að upplifa hana sjálf þegar ég byrjaði í liðinu. Hann byrjaði á að senda mér skilaboð á kvöldin sem urðu fljótt óviðeigandi og kynferðisleg. Svo fann hann alltaf afsökun til að snerta mig á æfingum og reyndi oft að ná mér einni. Ég tilkynnti hann til félagsins eftir að hann króaði mig af inni í klefa, káfaði á mér og reyndi að kyssa mig.

Hann Jonni minn er svo indæll drengur. Hann skutlar mér alltaf til læknis og kíkir í kaffi á sunnudögum. Ótrúlega leiðinlegt hvað hann er alltaf óheppinn með kærustur samt.

Jonni er algjört topp eintak. Alltaf hress og skemmtilegur og ótrúlega hæfileikaríkur drengur. Ég fann virkilega til með honum þegar allar þessar sögur fóru af stað um hann, ömurlegt hvað hann hefur þurft að þola mikið. 

Ég var með Jonna í nokkur ár og sambandið var frábært fyrst, hann var svo sjarmerandi og ljúfur. Ofbeldið hófst eftir rúmlega ár í sambúð, bæði andlegt og líkamlegt, og hann hótaði því reglulega að deila nektarmyndum af mér á netinu ef ég myndi hætta með honum. Þegar ég komst loksins frá honum stóð hann við orð sín og sendi myndirnar á alla fjölskylduna mína og yfirmanninn minn.